🚨 مستشفى سيدي سالم بين هتتنقل ولا هتتبني مكانها. والمواطن بقى محتاج يعرف الحقيقة.
الدكتورفتوح منصور لما طلع يستغيث بخصوص وضع مستشفى سيدي سالم الدنيا قامت وماقعدتش وكل فريق نزل الميدان يدافع عن مرشحه وكأننا في ماتش نهائي مش قضية صحة ناس وغلابة.
فريق أول يقولك المستشفى هتتنقل لمنشأة علي والأوراق خلصت والموافقات جاية من فوق فوق وحتى السرفيس جاهز ينقل الناس طيب ليه هتتنقل؟ يقولك المساحة مش كفاية. حلو لحد هنا تمام 👌
تقوم فجأة تسمع الفريق التاني طالع ببشرى سارة لأ يا جماعة المستشفى هتتبني مكانها من جديد ذى النائب ما قال وحياة من انشانى هابنيكى تانى فى مكانها والموافقات خلاص وصلت طب ازاي؟ ما المساحة مش كفاية؟ يقولك ولا يهمك هناخد مدرسة التجارة بنين ليه؟ أصل التعليم التجارى هيتلغي. طب والتعليم؟ الصحة أهم. طيب والمساحة ؟ بسيطة هناخد جزء من الشارع اللى بين المستشفى والمدارس والدنيا فل أوي والأوراق جاهزة
يعني باختصار كل طرف معاه موافقات وكل طرف معاه أوراق وكل طرف بيقول القرار النهائي عندنا.
وإحنا أهالي سيدي سالم قاعدين في النص مش عارفين نصدق مين ولا مين .
الحقيقة الوحيدة الواضحة وسط كل الضباب ده إن المواطن بقى آخر واحد يعرف الحقيقة وإن موسم الانتخابات عند بعض الناس أهم من صحة آلاف المرضى.
وهنا لازم نقول بصراحة استغاثة دفتوح منصور كشفت حاجات كتير جدًا لأهالي سيدي سالم وخلّت ناس كتير تراجع نفسها وتسأل إحنا اخترنا صح؟
تحية للدكتورفتوح منصور على صراحته وشجاعته في فتح الملف.
ورسالتنا واضحة
أهالي سيدي سالم مش عايزين شو إعلامي ولا معارك مصالح إحنا عايزين مستشفى محترمة تخدم الناس بجد بعيد عن شعارات إحنا جبنا الموافقات وإحنا خلصنا الورق.
كفاية بقى لعب بمشاعر الناس لأن صحة المواطن مش دعاية انتخابية.